Mecayapan

A̱ltepe̱tzontekon Mecayapan, onoꞌ iki̱sáyampa tonati̱ꞌ pan Estado de Veracruz, pan íta̱l Olme̱caj. Iní̱n a̱ltepe̱ꞌ onoꞌ iyi̱xko lámar 360 metros iga ajko.

Mecayapan kijtowaj iga mochij a̱ltepe̱ꞌ pox ikya̱y, pan xiwiꞌ 700 kua̱ꞌ aya asiáj españo̱lmej. Tokni̱wa̱n yej walkej Ayahualulco, yej iná̱n moto̱ka̱wiá Huimanguillo, yej ono' pan íta̱l Tabasco. Yej achto momatiꞌ yej mojtoj pan xiwiꞌ 1580, kijtowaj iga Mecayapan iya̱ltepe̱tzontékon yajki Guazaucualco, ikó̱n kijtowaj tokni̱mej Suero de Cangas iwá̱n Quiñonez yej kichikej se̱ tekipano̱l ka̱n kine̱xtijkej iga a̱ltepe̱tzontékon motoka̱wij inó̱n ve̱j La Villa del Espíritu Santo, yej iná̱n kito̱ka̱wiáj Coatzacoalcos. Eꞌ pan xiwiꞌ 1700, mochij seꞌ iya̱ltepe̱tzontekon yej ito̱ka̱ꞌ San Martín Acayucan.

Pan xiwiꞌ 1705 a̱ltepe̱ꞌ Santiago Macayapa, onoya̱y ḵan iná̱n onoꞌ, ijkó̱ onoꞌ pan se̱ a̱maꞌ yej ito̱ka̱ꞌ Archivo General de la Nación yej mochij pan 22 de agosto, pansan inó̱n xiwiꞌ.

Mecayapan mochij A̱tepe̱tzontekon pan xiwiꞌ 1917, kua̱ꞌ ki̱saꞌya pan ima̱ꞌ Acayucan iga La Constitución Federal de los Estados Unidos Mexicanos kipólojya inó̱n ka̱n ken ticha̱ntitóyajaꞌ, inó̱n ve̱j mochij iga isé̱ltiya ka̱wiꞌ wa̱n mochij Tzontékon iga a̱ltepe̱mej yej najná̱ꞌsan onoyaj.