Totájto̱l wa̱n toa̱ltepe̱ꞌ

Tomelaꞌtájto̱l mo-i̱xmati no̱ iga náhuatl. Ipan país de México onoꞌ pox komati tajto̱lmej, ken popoluca, zapoteco wa̱n mixteco. Wa̱n kijtowaj iga zapoteco ayéj se̱san tájto̱l; masi 50 variantes. Ijkó̱n pan país de Mexico onokej ken 360 tajto̱lmej.

Ijko̱nsan no̱ in náhuatl, ayá̱ꞌ se̱san onoꞌ. Onokej ken 30 variantes yej toknimej tajtowaj ipan miaꞌ a̱ltepe̱ꞌ pan miaꞌ estado. Onokej yej tajtowaj náhuatl pan Ciudad de México iwá̱n estados de Durango, México, Guerrero, Michoacán, Morelos, Oaxaca, Puebla, San Luis Potosí, Tabasco, Tlaxcala wa̱n Veracruz.

Tomelaꞌtájto̱l yej mokaki pan a̱ltepe̱mej yej najná̱ꞌ Mecayapan wa̱n Tatahuicapan kipiá se̱ código yej nhx. Wel tikijtowaj iga se̱san melaꞌtájtol, eꞌ ono' tájto̱l yej mokaki pan sekin a̱ltepe̱ꞌ wa̱n ayá̱ꞌ ijko̱nsan mokaki pan seꞌ. Ne̱si onokej a̱ltepe̱mej yej má̱j tajtowaj ken Mecayapan wa̱n sekin yej má̱j tajtowaj ken Tatahuicapan.

Nij tikasis ka̱n ijkuilijto' tajto̱lmej yej te̱ne̱xtiliá iga ka̱naj ayéj se̱san mela'tájto̱l.

¡No̱ xikejla̱miki!, tomelaꞌtájto̱l acho̱nsan no̱ vale̱rowa ke̱ꞌ ti̱ltiꞌtájto̱l. Ijkó̱n kijtowa “La Ley General de Derechos Lingüísticos de lo Pueblos Indígenas”, iní̱n te̱mati̱ltij el Diario Oficial de la Federación pan xiwiꞌ 2003. Ipan ARTÍCULO 4 kijtowa:

   Las lenguas indígenas que se reconozcan en los términos de la presente Ley y el español son lenguas nacionales por su origen histórico, y tienen la misma validez en su territorio, localización y contexto en que se hablen.