Ken iga mochij la traducción

Nigaj nimitzne̱xtiliáj EL Nuevo Testamento pan tomelaꞌtajto̱l, iga Dios ne̱palewijkej iwá̱n nipa̱kij iga a̱man wel ono nochi ijkuilijtoꞌ, malej poxsan onoto yej kitzakulijka iga amo mamochi̱wa, eꞌ toknimej amosemakakej, kimakakej nochi iya̱lma ga wel matzo̱pi.

Ga mo-ijkuloj poxsan wejka, pe̱waꞌ pan xiwiꞌ 1943 kua̱ꞌ asiꞌ pan a̱ltepe̱ꞌ tokni̱n Guillermo Law wa̱n isiwa̱ꞌ Joan, yej tekipanowa wa̱n El Instituto Lingüístico de Verano, kipalewijkej séki̱n tokni̱mej iga kijkulojkej toTeko itájto̱l, yej wel tikejla̱mikij ken tokni̱n Crescencio Salas Bautista, yej tekipanoj wa̱n yéj iga kipe̱waltijkej iga kijkuilojkej. Eꞌ mie̱j nemi kijkuilowaj onoto poxsan yej aya̱ꞌ kiyeꞌitaya iwá̱n akinekiáj nite̱ mamochi̱wa, Este tekiwajmej kinekiáj makikajte̱walti̱ka̱n, ‘e aya̱ꞌ mosemakakej niga toTeko akikajtejkej.

Panya seꞌ xiwiꞌ 1965, asiꞌ se tokni̱n ito̱ka̱̱ꞌ Carlos Wolgemuth wa̱n isiwa̱ꞌ Marilyn., inó̱n ve̱j ayꞌ teyi Guillermo, yej pe̱waꞌ iga sej kijkuiloj yej toTe̱ko itatki wa̱n tokni̱n Genaro González yej weljoꞌ tikejla̱mikij, anka inó̱n ve̱j no̱ acho̱ꞌ tekipanoj el hermano Crescencio Salas.

Eꞌ pan siwiꞌ 1984, asiꞌ tokni̱n Cristobal Hurst wa̱n isiwa̱ꞌ Elena, nigaj onoko ken 30 xiwiꞌ, kimaꞌ nochi iya̱lmaj iga itájto̱l toTe̱ko, kensan tokni̱mej yej kijkuilojkej kimakakej nochi itajpalmej, mone̱xtijkej no̱yaj iga yejeme̱n ye̱ꞌ nemiáj iyi̱xtaj toTe̱ko, kensan tio̱panijtiꞌ ijkó̱nsan no̱ pan a̱ltepe̱ꞌ.

Kua̱ꞌ kitamijkej kijkuilojkej ijkó̱n no̱ tamiꞌ iga tokni̱wa̱n consultores yej poxsan momachtijkej pan itájtolmej griegojmej kitakej siga ye̱ꞌijkuilijtoya. Kua̱ꞌ tamiꞌ nochi iní̱n, yajki pan xiwiꞌ 2016, iwán moti̱tánya Corea ka̱n mochij li̱brojmej del Nuevo testamento. Iga kijto̱to  xiwiꞌ 2017 pan febrero mochij weyi ilwiꞌ ka̱n mone̱xtij toTe̱ko itájto̱l pan melaꞌtájto̱l. ompa asikej pox miá tokni̱mej de mia̱ miáꞌ tiopamej yej onoꞌ pan a̱ltepe̱ꞌ iwá̱n yej pan seꞌ a̱ltepe̱mej melaꞌtajtowa̱nimej.

A̱man, nimitzijliáj iga xipa̱kika̱n iga wel xikmawiso̱kan iní̱n yej Dios itájto̱l yej onoꞌ pan tomelaꞌtájto̱l, iwá̱n nikmati iga tamis tiki̱xpowas ayꞌ ijkó̱nsan tonos.

“Inochi itájto̱l Dios, ino̱nwa Dios nokta kitajto̱lmá yej kijkuilojkej, iwá̱n wel íga titamachtiáj, wel titano̱no̱tzaj, iwá̱n wel tikne̱xtiliáj sekin iga mamoyo̱lpataka̱n iwá̱n te̱ne̱xtiliá ken iga matiye̱nemika̱n. Ijkó̱n, siga se̱ yej kitoka Dios momachtiá itájto̱l wa̱n kichi̱wa ken kijtowa, wel kichi̱wa inochi yej Dios kineki, nochi nokta yej ye̱kti” (2 Timoteo 3:16).